Search This Blog

Monday, 26 March 2018

निकाह हलाला, बहुपत्नीत्व घटनाविरोधी ?

निकाह हलाला व बहुपत्नीत्व या मुस्लिम समाजातील वादग्रस्त रुढी संविधानिक आहेत की असंविधानिक?, याची सर्वोच्च न्यायालय समीक्षा करणार आहे. सर्वोच्च न्यायालयाने हे प्रकरण पाच न्यायाधीशांच्या खंडपीठाकडे सोपविले असून हे खंडपीठ त्यावर निर्णय घेणार आहे. त्याशिवाय न्यायालयाने केंद्र सरकारला नोटीस बजावून त्यावर उत्तरही मागितले आहे.

नफीसा खानसहित चार याचिकाकर्त्यांनी सर्वोच्च न्यायालयात याचिका सादर करून निकाह हलाला व बहुपत्नीत्वाला असंविधानिक घोषित करण्याची मागणी केली आहे. मुस्लिम पर्सनल लॉ (शरीयत)च्या अधिनियम, १९३७ चे कलम २ हे संविधानाच्या अनुच्छेद १४,१५,२१ आणि २५ चं उल्लंघन करणारे आहे. मुस्लिम पर्सनल लॉचं हे कलम निकाह हलाला आणि बहुपत्नीत्वाला मान्यता देणारं आहे, असं याचिकेत म्हटलं आहे. तसंच भारतीय दंड संहिता १८६० च्या तरतुदी सर्व भारतीय नागरिकांना समान लागू आहेत. त्याशिवाय तीन तलाक आयपीसीच्या कलम ४९८-ए अन्वये क्रुरता समजली जाते, याकडेही या याचिकेत लक्ष वेधण्यात आले आहे. त्यामुळे सर्वोच्च न्यायालय आता निकाह हलाला आणि बहुपत्नीत्वाची समीक्षा करणार आहे. भाजप नेते अश्विनी उपाध्याय यांनीही याप्रकरणी सर्वोच्च न्यायालयात याचिका सादर केली असून भारत सरकार, विधी मंत्रालय आणि विधी आयोगाला प्रतिवादी बनविले आहे.

निकाह हलाला आयपीसीच्या कलम ३७५ नुसार बलात्कार असून बहुपत्नीत्व आयपीसी कलम ४९४ अन्वये गुन्हा आहे. निकाह हलाला, बहुपत्नीत्वपाठोपाठ आता मुता निकाह आणि मिस्यार निकाह ( ठराविक काळासाठी लग्न करणे)ला सुद्धा सर्वोच्च न्यायालयात आव्हान देण्यात आलं आहे. त्यावर सोमवारी सुनावणी होणार आहे. हैदराबाद येथील मोहिसिन बिन हुसैन यांनी सर्वोच्च न्यायालयात याचिका दाखल करून मुता आणि मिस्यार निकाहला अवैध घोषित करून रद्द करण्याची मागणी केली आहे. त्यांनी या याचिकेत निकाह हलाला आणि बहुपत्नीत्वालाही आव्हान दिलं आहे.

बहुपत्नीत्व काय आहे?
बहुपत्नीत्व ही एक इस्लामिक प्रथा आहे. या प्रथेनुसार पुरुषांना चार विवाह करण्याची परवानगी देण्यात आली आहे. विधवा आणि निराधार महिलेला आधार देणे हा त्यामागचा हेतू आहे. समाजातील वाईट प्रवृत्तींपासून त्यांचं संरक्षण होणं हे सुद्धा त्यामागचं एक कारण आहे.

निकाह हलाला काय आहे?
पती-पत्नीमध्ये तलाक झाला असेल आणि चूक झाल्याची भावना त्यांच्यात निर्माण झाली असेल तर पती पत्नीशी संबंध ठेवू शकतो. त्यासाठी महिलेला निकाह हलालाचं पालन करावं लागतं. म्हणजे तिला घटस्फोटीत व्यक्तीशी लग्नं करावं लागतं. त्याच्याशी संबंध ठेवल्यानंतर त्याला तलाक देऊन पहिल्या पतीसोबत निकाह करावा लागतो, त्याला निकाह हलाला म्हणतात. वारंवार तलाक घेण्याचे प्रकार घडू नयेत यासाठी ही प्रथा प्रचलित झाल्याचं सांगण्यात येतं.
[Source: Maha Times | March 27, 2018]

0 comments:

Post a Comment

आपले अभिप्राय आमच्या साठी नक्कीच महत्वाचे आहेत ....
टीम स्पर्धावाहिनी